Старшы інспектар па абароне дзяржсакрэтаў Марына Нікіціна працуе ў раённым аддзяленні Дэпартамента аховы толькі трэці год. Але і за гэты час яна заваявала давер кіраўніцтва і павагу саслужыўцаў.
З сям’ёй Нікіціных з Параф’янава чытачы раёнкі ўжо знаёмы: летась Марына і Віктар разам з сыночкамі Яраславам і Уладзіславам прадстаўлялі наш раён на абласным этапе рэспубліканскага праекта “Уладар сяла” і амаль сталі яго пераможцамі (да першага месца не хапіла ўсяго толькі аднаго бала). 
– Мая работа патрабуе адказнасці, дысцыплінаванасці, сканцэнтраванасці, – гаворыць Марына. – Нездарма аддзел па абароне дзяржаўных сакрэтаў і справаводстве называюць крывяноснай сістэмай арганізацыі. У маіх абавязках рэгістрацыя ўсёй уваходзячай карэспандэнцыі, работа са зваротамі грамадзян, праверка правільнасці афармлення дакументаў, кантроль тэрмінаў выканання рэзалюцый і многае іншае. Камусьці можа здацца складаным правесці цэлы дзень за дзелавымі паперамі. А мне падабаецца.
Старшы інспектар з’яўляецца сувязным звяном паміж  кіраўніцтвам і асабовым саставам. І тут ад Марыны патрабуецца яшчэ і камунікабельнасць. Здольнасць лёгка і паспяхова наладжваць кантакт з іншымі людзьмі, знаходзіць з імі агульную мову. Будаваць як сяброўскія, так і дзелавыя адносіны і падтрымліваць іх дапамагаюць Марыне Нікіцінай яшчэ ў адной адказнай пасадзе ў аддзяленні. Яна – старшыня прафсаюзнай пярвічкі.
– Адна з галоўных задач прафсаюзнага камітэта – стварэнне для яго членаў магчымасцей рознабаковага развіцця, – лічыць Марына. – Гэтаму дапамагае арганізацыя культурна-масавай і спартыўнай работы. Члены нашага прафсаюза актыўна ўдзельнічаюць у раённых мерапрыемствах, пра што гаворыць стос грамат і дыпломаў.

Яўгенія МАЛЕВІЧ
Фота аўтара